Ginpahayag sang Department of Social Welfare and Development (DSWD) nga nagpakig-angot na ang ahensya sa pamilya ni Mary Anne Velazquez de Vera, isa ka pinay caregiver nga napatay sa Israel sa tunga sang krisis didto.
Ginpakigbahin ni DSWD Spokesperson Irene Dumlao nga ginahikot na sang ahensya ang dugang nga mga interbensyon para sa pamilya ni Mary Anne, partikular ang medikal nga suporta para sa amay sini nga may yara sang balatian.
Suno diri, si Mary Anne amo ang breadwinner sang iya pamilya gani ang wala sa oras nga pagtaliwan niya ang nagbilin sa iya pamilya sa indi maayo nga kahimtangan.
Samtang, ginpasiguro ni Dumlao ang ila koordinasyon sa Department of Migrant Workers (DMW), kasunod sa direktiba ni Presidente Ferdinand Marcos Jr. agud mabantayan kag mabuligan ang mga overseas Filipino Workers (OFWs) nga apektado sang nagapadayon nga kinagamo sa Middle East.
Apang wala pa nagapagwa ang DSWD sang kaugalingon nga datos tuhoy sa numero sang mga OFW nga ila pagabuligan, may yara na sang updated figures ang DMW.
