Ginkumpirmar sang Qatar Ministry of Defense nga nakaeksperyensya ang pungsod sang missile attack kahapon, Marso 5, samtang aktibo ini nga gin-intercept sang ila nga air defense systems.
Bangud sini, nagpanawagan ang gobyerno sa mga pumuluyo, residente, kag mga foreigner nga magpabilin nga kalmado, tumanon ang mga pagsulondan kag likawan ang pagpalapta sang fake news.
Madumduman nga una nga ginhambal sang Qatar sang Martes nga hindi lamang ang mga military facility ang gintarget sang Iran kundi pati ang kabug-usan nga teritoryo sang Qatar, nalakip na diri ang Hamad International Airport kag mga gas facility sa pungsod.
Suno sa mga otoridad, naka-intercept sila sang duha ka Iranian fighter jets nga nagsulod sa ila nga airspace sang nakaligad nga Lunes.
Dugang pa diri, nakahanda na ang Qatar kag himuon nila ang tanan nga nagakadapat nga tikang agud maprotektahan ang pungsod.
Suno kay Majed Al Ansari, spokesperson sang Qatar Ministry of Foreign Affairs, wala sang bukas nga linya sang komunikasyon sa tunga sang Qatar kag Iran.
Ginpaathag man sini nga handa ang pungsod nga magtimalos bangud may-ara sila sang bastante nga air-defense missiles nga magpangatubang sa tanan nga posible nga pag-atake.
Samtang, nagapabilin nga sirado ang airspace sang Qatar kag may yara ginabanta nga 8,000 ka transit passengers ang stranded.
