Dako ang kalipay sang alkalde sa ciudad sang Bacolod sa performance nga ginpakita sang Bacolod athletes sa Negros Island Region Athletics Association Meet 2026.
Si Mayor Greg ang makita gid nga nagalibot sa nagkalainlain nga game venues agud maglantaw sang hampang.
Ginapakamaayo sini nga wala sang narecord nga seryoso nga sports injuries sa hinampang.
Suno sa alkalde, ang pagdominar sang Bacolod City sang medalya ang resulta na sang ila nga pagpangabudlay.
Mensahe naman sini sa mga napaslawan, nga magpadayun lamang bangod bilog ang bola, kag maga-abot gid ang tion nga sila naman ang magadaog.
Suno kay Mayor Greg, ginhatag sang ciudad ang tanan nga suporta para sa mga atleta, agud mabatyagan man sang mga atleta ang suporta kag maka-inspire sa ila sa paghatag sang mas maayo nga performance.
Samtang, nakuha sang Bacolod Tay Tung High School ang kampeonato sa Volleyball Secondary Girls sa hampang batok sa team sang Silay City sa Negros Island Region Athletics Association Meet 2026.
Gindomenar sang Bacolod ang tatlo ka sunod-sunod nga set sa score nga 25-11, 25 13 kag 25-12.
Gindeklarar naman nga Most Valuable Player (MVP) si Rhose Almendralejo.
Sa interview sang Bombo Radyo Bacolod kay Brianna Nikola Ang, team captain sang team, madamo pa sila sang kinahanglan nga ipolish antes ang paghampang sa Palarong Pambansa.
Dako naman nga butang sa ila kadalag-an ang bond sang ila nga team nga nakabulig para sa mas maayo nga teamwork.
Samtang ginapasalamatan man nila ang tanan nga nagasuporta.
Tuman ka puno ang venue sang hampang matapos magdugok ang supporters sang magkasumpong nga team.
Kun sa diin ang mga Bacolod supporters ang nagagamit sang torotot samtang drums naman ang dala sang Silay supporters.
Wala man nagpaulihi sang suporta si Bacolod City Mayor Greg Gasataya, City Administrator Atty. Mark Steven Mayo kag iban pa nga opisyales sang ciudad.
Matapos ang pagdaog, napuno man ang venue sang singgitan sang “Bacolod for Palaro.”
Kampeon man ang Volleyball Elementary Girls sang Bacolod Tay Tung High School.
