Ginklaro sang Social Welfare and Development Officer sa Bago City nga kun pila lamang ang listahan nga ginpadala sang Barangay para makabatun sang cash assistance angot sa Bagyo TINO, amo lamang ang mahatagan sang budget.
Ini kasunod sang masobra 100 nga pamilya nga naleft-out ukon wala nadala sa masterlist sang Emergency Cash Assistance sa Brgy Dulao, Bago City, apang ginpaproseso sang Barangay sang mga requirements.
Sa interview sang Bombo Radyo Bacolod kay Jona Amelia, Social Welfare Officer 4 sang Bago City Social Welfare and Development Office, ginpasumiter nila ang kada Barangay sang numero sang severely kag slightly damaged nga balay bangod sa Bagyo TINO.
Paathag sini nga wala sang limit sa malista, bangod tanan nga apektado ang ginapalakip sa listahan.
Ang Brgy Dulao ang nagpadala sang 205 severely damaged kag 1,282 lightly damaged nga balay.
Paathag sang Social Welfare Officer nga may-ara sang ginhatag nga deadline sa pagsumiter sang numero sang apektado sa Barangay.
Suno diri, kun may-ara sang left-out ukon nabilin nga wala nalista sa Barangay, ini ang indi na mapaapas bangod ang listahan ang napirmahan na kag napanaugan na sang budget.
Pahanumdom ni Amelia, nga sa kaangay ka dako nga kalamidad, responsibilidad sang Barangay nga magvalidate sang apektado nga pumuluyo.
