Nagapadayon ang imbestigasyon sang Talisay City Police Station sa nasapwan nga bangkay sa Hda. Otilia Lacson, Brgy. Efigenio Lizares Talisay City, Negros Occidental kahapon sang kaagahon.
Ang biktima ang ginkilala nga si Jayvee Geronca Arellano alyas ‘Jaja’, residente sang Hermilinda Homes, Brgy Mansilingan, Bacolod City.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, ang biktima ang positibo nga gintumod sang iya nga utod kag anay asawa.
Suno kay Jocson, padayon ang ila nga imbestigasyon agud nga matumod ang motibo sa pagpatay sa biktima.
Dugang pa sini nga ang mga ginpangpost sa social media nga nagapahayag nga isa ka scammer ang biktima ang gina-upod nila sa imbestigasyon paagi sa pagvalidate sang nasambit nga impormasyon.
Nagdihon man ang Talisay City Police Station sang Special Investigation Task Group (SITG) nga matutok sa imbestigasyon sa pagpatay sa biktima.
