Patigayunon na sa Kamara ang imbestigasyon natuhoy sa gina-alegar maanomaliya nga pagbakal sang Department of Health (DOH) sang mga Mobile Primary Care Facilities (MPCF) matapos pormal nga ginsuportahan sang mayorya sang National Unity Party (NUP).
Ginsuportahan sang NUP ang panawagan ni Quezon City 3rd District Rep. Franz Pumaren nga ipaidalom sa legislative inquiry ang ahensya.
Tinutuyo nga paga-usisaon sa ginaduso nga hearing ang nangin sistema sang procurement, oversight, kag aktwal nga pagpatuman sang multi-billion pesos nga programa sang departamento.
Ginpaathag ni NUP Chairperson kag Deputy Speaker Ronaldo Puno nga indi dapat pasipalahon ang isyu kag nagakadapat nga usisaon ini bangud buwis sang pumuluyo ang gingamit diri.
Suno kay Puno, nagdangat sa P1.8 bilyon ang pampubliko nga pondo ang gin-alokar para sa proyekto, gani suno diri obligado ang ahensya nga maghatag sang detalyado kag maathag nga sabat sa Kongreso.
Pormal na nga ginpasakaan sang reklamo sa Office of the Ombudsman ang pila ka mga opisyal sang DOH.
Nalakip sa mga ginreklamo si Health Secretary Teodoro Herbosa, nga naulamid subong sa gina-alegar bid rigging kag iban pa nga iregularidad sa kabug-usan nga procurement process sang mga nasambit nga klinika.
