Nagpasalamat ang city director sang Bacolod City Police Office (BCPO) sa mga kapulisan sa madasig nga pagdakop sa tatlo ka mga suspek sa pagtiro-patay sa anay Barangay Tanod sa Barangay 22 sang Biyernes, Marso 13.
Ginkilala ang biktima nga si Ruben Altamira, residente sang Purok Gahili-ugyon, Barangay 23, Bacolod City, anay Barangay Tanod kag nagatrabaho sa nagabulante sang tela.
Madumduman nga nadakpan na ang tatlo ka mga suspek nga ginalakipan sang duha ka mag-utod nga sanday alyas Jeremy kag alyas Junjun kag ang ila bayaw nga si alyas Jonathan.
Sa interview sang Bombo Radyo kay Police Col Eugene Rebadomia, ginpasalamatan sini ang mga pumuluyo sa pagbulig pagtudlo sa mga suspetsado kag ang mga brgy officials nga nag-upod sa mga kapulisan sa ginpatigayon nga inspection sa lugar.
Ginpanginbulahan sang city director ang mga kapulisan sa nangin madinalag-on hot-pursuit operation sa pagdakop sa tatlo ka mga suspetsado.
Suno kay Rebadomia, ang mga armas-luthang kag mga bala nga narecover ang ipadalom sa examination agud ma-identify kun bala naimbulbar ini sa iban nga mga kaso sa ciudad kag lauman nga makuha ang resulta sa masunod nga semana.
