Luwas sa katalagman ang 12 ka Pinoy nga seaferers nga sakay sang isa ka barko nga gin-atake sa kadagatan nga sakop sang Iran.
Ini ang ginkumpirmar sang Department of Migrant Workers (DMW), matapos magpakig-angot sang mga otoridad kag kompanya sang barko.
Suno kay DMW Secretary Hans Leo Cacdac, nakabaton ang ahensya sang opisyal nga report naggikan sa mga ship owners nga nagapamatuod nga yara na sa maayo nga kahimtangan ang mga apektado nga tripulante.
Magluwas sa 12 ka mananagat, ginsiguro man ni Cacdac nga luwas ang masobra 7,000 ka mga Pilipino seafarers nga sakay sang nagkalain-lain nga barko malapit sa Strait of Hormuz.
Ginpaathag sang ahensya nga may opsyon ang mga mananagat nga balibaran ang pagsakay sa mga barko nga nakatalana nga magbyahe sa mga high-risk areas.
Nalakip sa mga ginatuhoy nga delikado nga ruta amo ang Strait of Hormuz, Persian Gulf, kag Gulf of Oman.
Madumduman nga nauna na nga gindeklara sang DMW ang mga nasambit nga rehiyon bilang war risk operations areas bangud sa nagapadayon nga tensyon sa Middle East.
