Ginreport sang Department of Migrant Workers (DMW) nga nagahingyo sang repatriation ang masobra 800 overseas Filipino workers (OFWs) sa Middle East.
Suno kay DMW Secretary Hans Leo Cacdac, nakahanda na para sa repatriation ang 800 OFWs nga naggikan sa lima ka pungsod.
Samtang, ang ginalantaw sa karon nga problema sa pag-repatriate sa mga OFW amo ang land crossing, bangud ang tatlo sa lima ka pungsod ang sirado na ang airspace nalakip ang Kuwait, Bahrain, kag Israel.
Ginpahayag man ni Cacdac nga limitado ang commercial flights nga ginapahanugutan sang Qatar kag United Arab Emirates pinaagi sang air corridors.
Suno diri, nagabulig man ang mga opisyal sang DMW kag OWWA sa DFA ambassadors agud mabuligan ang mga OFW nga mapatigayon ang land crossing sa Kuwait, Bahrain, kag Israel.
Ang mga OFWs nga makaguwa gikan sa Kuwait, Bahrain kag Qatar ang isakay sa chartered flight sa Saudi Arabia.
Samtang, nakatalana naman nga mag-areglo ang gobyerno sang Pilipinas sang isa pa ka flight naggikan sa Saudi Arabia subong nga semana.
