Nagpamahog si US President Donald Trump batok sa Iran kun sa diin hatagan niya ang Tehran sang duha ka adlaw agud liwat nga buksan ang Strait of Hormuz ukon bombahan sang Amerika ang ila mga planta sang kuryente.
Sa iya social media post, nagpamahog si Trump nga gub-on sang pwersa militar sang Amerika ang mga power grid sang Iran, humalin sa pinakadako, kun ini ang magapabilin nga sirado sa sulod sang 48 ka oras.
Ang tensyon nga ini ang naghalin sa de facto blockade sang Iran sa nasambit nga kipot, nga ginaagyan sang 20 percent sang langis sa bug-os nga kalibutan, nga nagtuga sang pagsaka sang presyo sa masobra $100 kada bariles.
Sabat naman sang Iran sa pamahog ni Trump, nagpaandam man militar sang Iran nga puntiryahun man nila ang mga enerhiya kag desalination infrastructure sang Amerika sa rehiyon kun ipatigayon ni Trump ang iya pamahog.
