Tumpok-tumpok nga basura ang natipon sa kilid sang dalan sa Barangay Mansilingan, Bacolod City matapos ginhimo nga halaboyan sang basura ang lugar.
Sa Ipa-Bombo Ta segment, ginpadulongan sang Bombo News Team ang lugar nga ginareklamo nga ginhimo na halaboyan sang basura.
Naabtan na lamang sang team nga bilin na lamang nga basura ang yara sa area kag may nanutod na.
Sa interview sang Bombo Radyo sa 70 anyos nga si Jardelina Claridad sang barangay Handumanan, masobra apat ka tuig na ini nga nagapang-ukay sang basura para mangita sang mahimo niya nga mapa-scrap.
Suno diri, humalin pa sadto ginhimo nga halaboyan sang basura ang kilid sang dalan apang sang may nagluntad nga sunog, na-untat ang pagpanghaboy sang basura sa area apang nagsaylo naman sila sa malapit sa area sa Ta-ala Farms Inc.
Apang ginkakibot na lamang ni Claridad nga subong nga tuig liwat naman nga nagtumpok ang basura sa kilid sang dalan.
Suno pa diri, masami niya nga makita amo ang mga trisikad nga nagahaboy sang sinako nga mga basura.
Samtang, gin-athag naman ni Claridad nga wala siya nagahaboy sang basura sa lugar apang nagapang-scrap lamang para bisan papaano makaginansya sang P100 tubtob P200 kada adlaw.
Samtang, Ginreklamo sang pila ka mga pumuluyo ang nagapanimaho kag nagalinupad nga basura nga ginhaboy sa kilid sang dalan sa barangay Mansilingan, Bacolod City.
Sa interview sang Bombo Radyo kay Alyas Gina, madugay na nga ginahaboy ang mga basura didto apang ginaputos ini sa sako kag ginahigot sang hugot.
Suno diri, ginabutang didto ang mga basura bangod iban nga mga balay sulodlon na kag dapat nga ipaggwa na lang nila ang ila mga basura para makuha sang garbage collector.
Wala man kuntani sang problema kun didto ginabutang ang mga basura apang may mga manugscrap nga nagahulat kun may idul-ong nga sako sang basura kag ila ini ginabuksan kag gina-ula agud ukayon kay kun kaisa may yara pa sang mga bayo kag sapatos nga mahimo magamit kag may makuha sila nga pwede mapascrap.
Bangod sini, iban sa mga basura nagalinupad kag nagasulod sa mga pamalay kag kun kaisa nagahalit pa sa mga motorista nga nagalabay.
Magluwas sini, ginareklamo man ang baho sang basura nga naga-upod sa hangin.
Dugang pa sini, duha ka beses na nga may nagluntad nga sunog didto sang may nagpanutod kag ginpabay-an ang kalayo kag sang naghaboy sang sigarilyo ang naglabay nga tricycle driver.
Pahayag ni Gina, wala kun tani sang problema basta ginabalik lang sang mga manugscrap ang basura sa sako agud indi maglapta bangod adlaw-adlaw man gina-pick up ang basura sa area.
