Pasanyugon pa sang mga kapulisan sa Negros Island Region ang police visibility kadungan sang Semana Santa.
Sa interview sang Bombo Radyo Bacolod kay Police Lt Col Joem Malong, spokesperson sang Police Regional Office – Negros Island Region, kapin isa ka libo nga police personnel ang ideploy sa mga strategic areas sa Bacolod City, Negros Occidental, Negros Oriental kag Siquijor.
Lakip sa mga focus sang security deployment sa idalom sang Oplan Summer Vacation ukon Oplan SumVac 2026 ang pagbantay sa mga simbahan, aktibidad sang simbahan, masako nga dalanon, terminals, commercial establishments kag mga lalagawan kaangay sang beach resorts, inland resorts kag mga amusement parks kag iban pa nga places of covergence.
Suno diri, sa masunod nga semana, ipaidalom na sa heightened alert status ang tanan nga PNP units kag kanselado naman ang tanan nga leave luwas sa sickleave.
Pasanyugon sang mga ini ang police visibility agud maaseguro nga safe ang tanan nga mga travelers kag mga nagasaulog sang Holy Week.
Panugyan sini sa mga pumuluyo nga magkooperar sa otoridad kag magsunod sa mga safet protocols ilabi na sa mga palaliguan ukon lalagawan; kag seguruhon man nga yara sa maayo nga kondisyon ang mga salakyan kag ang driver antes magbyahe agud mapalayo sa mga aksidente.
