Pilason ang duha ka persona nga sakay sang motorsiklo matapos makabunggo sa royda nga nagaserbe nga warning device sa nakapark nga truck sa Sitio Hugno, Brgy Manalad, Ilog, Negros Occidental alas-7:35 kagab-i.
Ang mga biktima ang ginalakipan sang driver sang black and white nga Motorstar nga ginkilala nga si Alyas Reeyan, lalaki, kasado, residente sang Cauayan; kag ang backrider nga si Alyas Nel, kasado, 48 anyos, residente sang KM 114, Brgy Tabu, Ilog.
Ang Hino Truck nga kargado sang tubo ang ginamaneho naman ni Alyas Rene, kasado, 41 anyos, residente sang Brgy Salong, Kabankalan City.
Sa imbestigasyon sang Ilog Municipal Police Station, ang motorsiklo ang nagabyahe gikan sa banwa sang Cauayan padulong sa Kabankalan City.
Apang pagdangat sa lugar sang insidente, wala natalupangdan sang driver sang motorsiklo ang spare tire nga ginhamtang sa dalan bilang warning device.
Gani ini ang nabungguan sang motorsiklo, gani nag-angkon sang mga samad ang duha ka biktima.
Gilayon man nga gindala ang duha sa Lorenzo D Zayco District Hospital sa Kabankalan City para sa nagakaigo nga pagbulong.
