Nagapabilin ang posibilidad nga magdangat sa P200 ang presyo sang kada litro sang diesel sa Pilipinas suno sa Department of Energy (DOE).
Apang, nagalaum ang ahensya nga indi ini matabo.
Paathag ni Energy Secretary Sharon Garin nga indi pa sigurado kun ano ang resulta sang oil prices sa pungsod samtang nagapadayon ang negosasyon sa tunga sang Estados Unidos kag Iran.
Suno sa tiglikom, indi kontrolado sang gobyerno ang trading sang produktong petrolyo kag ang paghulag sang presyo sa global market tubtob sa lokal nga merkado.
Suno diri, sa maragtas sang Pilipinas, wala pa naglab-ot sa amo nga lebel ang presyo sang langis sa pungsod, apang madamo sang posible nga resulta sa trading sang langis sa global market.
Suno kay Garin, indi man gilayon magnubo ang presyo sang langis sa local market apisar matapos na ang gyera bangud sa permanente nga halit nga nabilin sini sa petroleum industry sa bug-os nga kalibutan.
Samtang ginpatuman naman sang mga petroleum companies ang ikalima na nga double digit price hike sa mga produktong petrolyo, nga nagresulta sa price range nga P130 tubtob P170 kada litro sa diesel.
