Nagpakig-angot na ang Department of Energy (DOE) sa Philippine Competition Commission (PCC) agud imbestigahan ang alegasyon sang posible nga cartelization sa kada semana nga oil price adjustments.
Suno kay Department of Energy (DOE) Secretary Sharon Garin, dapat usisaon kon may yara sang “anti-competitive behavior” nga nagakatabo sa tunga sang mga kompaniya sang langis, ilabi na gid nga natalupangdan nga ang mga pagsaka sang presyo ang dungan kag ang kantidad sang pagsaka sang presyo ang halos pareho.
Ginpahayag man ni Garin nga handa ang ahensya magrepaso sang sistema sang kada semana nga price adjustment.
Gin-athag man sang tiglikom nga ang mataas nga presyo sang langis sa global market ang nagapanguna nga hinungdan sang pagsaka sang presyo sang produktong petrolyo, apang handa ang DOE nga maghatag sang ginakinahanglan nga datos sa PCC para sa maid-id nga imbestigasyon.
Ginpasiguro ni Garin nga handa ang ahensiya nga ipagwa ang mga pangalan sang kumpaniya sang langis kun mapamatud-an nga may kontsabahay ang mga ini sa presyo.
