Ginsurrender sang driver kag helper sang isa ka panel van ang balor P21.5 million nga gina-alegar smuggled cigarettes sa checkpoint sang Bacolod Police Station 4 sa Purok Hervabuena, Circumfirential Road sa Brgy Villamonte, alas-3:00 kaina sang kaagahon.
Sa inisyal nga impormasyon sang Bombo News Team, natalupangdan sang 27 anyos nga driver kag 20 anyos nga helper sang ginrentahan nga panel van nga wala sang mga dokumento ukon resibo ang ginpakuha sa ila nga mga karton sang sigarilyo.
Ini ang gilayon man nila ginreport sa ila nga employer, nga nag-abiso nga isurrender sang mga ini ang illegal nga kargaminto sa police station.
Natabuan naman nga samtang nagabyahe, nalabayan nila ang checkpoint sang Bacolod Police Station 4, gani didto na lamang sila nagdulog kag ginreport ang illegal nga karga.
Narecover sa panel van ang 200 boxes sang tobacco cigarettes kag 15 boxes sang cannon cigarettes nga may kabug-usan nga 10,750 reams.
Ang kada ream ang nagabalor P2,000, gani nagadangat ang market value sang illegal nga produkto sa P21,500,000.
Suno sa driver, sila ang ginkontrata sa pagdeliver sang mga karton sa Victorias City.
Apang wala pa sang mga ini mabuyagyag kun sin-o ang nagkontrata sa ila kag kun sin-o ang pagadul-ongan.
Ang mga alleged smuggled cigarettes ang iturn-over naman sa Bureau of Internal Revenue para sa formal verification kun ini ang naglapas layi sa excise tax kag smuggling.
