Duha ka separado nga grassfire ang nagluntad sa syudad sang Bacolod kahapon, Abril 14.
Sa interview sang Bombo Radyo Bacolod kay Fire Officer 2 Rolin Paulan, Chief Investigator sang Bacolod City Fire Station, ang isa ka insidente ang nagluntad sa boundary sang syudad sang Bacolod kag Talisay alas-2:23 sang hapon.
Suno kay Paulan, nag-augment lamang ang Bacolod City fire station sa pagpalong sang kalayo, samtang ang Talisay City Fire Station amo ang maga-uyat sang imbestigasyon.
Ginabanta naglapta ang kalayo isa ka ektarya ang kalaparon, kag nakontrol ini pasado alas-5:00 sang hapon.
Suno diri, nagtuga sang madamol nga aso ang sunog rason nga temporaryo nga ginrelocate ang mga residente sa Multi-Purpose Hall sa Barangay Banago.
Sa pihak nga bahin, nagluntad man ang ikaduha nga grassfire incident sa reclamation area sa Bacolod City nga nag-umpisa pasado alas-4:00 sang hapon kag gin-deklarar nga fire out alas-5:19 sang hapon.
Suno kay Paulan, sila ang nagpatigayon sang control burning agud malikawan ang mas dako nga sunog kag maprotektahan ang mga istruktura kag iban pa nga valuables items.
Suno diri, naglapta ang kalayo sa 20,000 square meters ukon duha ka ektarya.
Padayon pa ang imbestigasyon sang mga otoridad angut sa ginhalinan sang duha ka sunog.
