May ginpatigayon nga libre sakay ang Local Government Unit sang Bacolod City para sa mga nastranded nga pasahero bangod sa transport strike subong nga adlaw.
Pila ka mga buluthuan sa ciudad ang nagkansela sang face to face class apang ang trabaho naman sa Bacolod City Government nagapadayon.
Ang libre sakay program nag-umpisa alas- 7:00 kaina sang aga tubtob alas- 5:00 subong nga hapon kun sa diin may yara sang duha ka trip sa aga kag duha ka trip sa hapon.
Para sa Bata nga ruta, ang pick-up point yara sa Mormon’s Church kag ini may byahe nga Lacson, Rizal, Plaza, Burgos kag Bacolod City Government Center; samtang ang isa pa gid ka ruta amo ang Lacson, BS Aquino Drive, Burgos, kag Bacolod City Government Center.
Ang Banago nga ruta may pick-up point sa Banago Barangay Hall nga may byahe nga kaangay sa mga Jeep nga may ruta sa Banago.
Ang Singcang-Airport Route may pick-up point nga Calong-calong/Palmas Del Mar kag may byahe nga Singcang Jeep Route, Plaza, kag Bacolod City Government Center.
Ang Estefania Route may pick-up point nga Estefania Barangay Hall kag may byahe nga kaangay man sang byahe sang mga jeep sa Estefania.
Ang Mansilingan (Paglaum Village) Route may pick-up point nga Bangga Paglaum Village kag may byahe nga kaangay sa mga jeep sa Mansilingan.
Samtang ang Cabug-Alijis Route naman may pick-up point nga Bangga Cabug kag may byahe nga Araneta, Plaza, Gatuslao, 888 Mall, Burgos, Lopue’s East, kag Bacolod City Government Center.
Suno kay Bacolod City Mayor Greg Gasataya, bangod gina-implementar ang 4 days work week, kag may isa ka adlaw nga work from home, dapat padayon ang trabaho.
Iga-cater sang libre sakay ang mga empleyado sang city government agud indi maapektohan ang ila trabaho bisan may yara sang transport strike.
