Gindeklarar ni US President Donald Trump nga ‘permanently open’ na ang Strait of Hormuz sa pihak sang iya nagapadayon nga naval blockade kag sa tunga sang pagkabalaka gikan sa China.
Ginpahayag sang Presidente kahapon nga magabukas na ang Strait matapos ang pribado nga pakighinun-anon sa Chinese leader nga si Xi Jinping.
Sa truth social post ni Trump, ginpahayag niya nga nalipay ang China bangud ginbuksan niya ang Strait of Hormuz, dugang pa, ginhimo ini nga tikang ni Trump para sa China kag sa bug-os nga kalibutan.
Ginkumpirmar man sang U.S. President nga nagpasugot na ang China nga indi na magpadala sang mga armas sa Iran samtang nagapadayon ang gyera.
Dugang pa ni Trump, ginapaabot niya nga hakuson siya ni Xi Jinping sa iya pagbisita sa China sa masunod nga semana para magpabutyag sang pagpasalamat.
Samtang, sa pihak nga bahin, ginpahayag sang commander sang Khatam Al-Anbiya Central Headquarters sang pwersa militar sang Iran nga ang ginpatigayon sang Estados Unidos nga naval blockade sa Iranian ports amo isa ka bayolasyon sa ginkasugtan nga ceasefire.
Nagpaandam si General Ali Abdollahi sa Estados Unidos nga kun magpadayon pa ang pagpamalabag, indi na magpahanugot ang Iran sang mga exports kag imports sa Persian Gulf, Gulf of Oman, kag sa Red Sea.
