Minilyon ka mga Pilipino nga kabahin sang middle class ang posible mamigado na gid sa padayon nga pagsaka sang presyo sang langis tuga sang kinagamo sa Middle East suno kay Marikina Representative Romero Quimbo.
Sa ikatatlo nga hearing sang LEAD Committee, ginpahayag ni Quimbo nga apektado ang tanan nga sektor sa pagsaka sang presyo sang mga balaklon kalakip na ang pagkaon.
Suno diri, indi dapat pagkalimtan sang gobyerno ang middle class nga sa masami indi masakop sang mga programa sa ayuda sa tion sang krisis.
Suno kay Quimbo, indi kakulangan sa suplay sang langis ang problema kundi ang ikasarang sang mga pumuluyo nga magbakal sang mga basic commodities.
Samtang, ginpahayag ni Cagayan de Oro Rep. Rufus Rodriguez nga 45 percent sang populasyon sang pungsod ang kabahin sa middle class, samtang 1.5 percent lamang ang mga manggaranon, kag ang nabilin amo ang mga imol.
Suno kay Quimbo, amat-amat nga ginapahuyang sang oil price hike ang ikasarang sang mga Pilipino nga matuman ang pang-adlaw-adlaw nga kinahanglanon.
Ginpaathag man niya nga ang mga mamumugon ang nagapahulag sa ekonomiya gani kun maapektohan ang ila paggastos, apektado man ang kabug-usan nga hulag sang ekonomiya.
