Aminado si Alliance of Concerned Teacher’s Representative Antonio Tinio nga balantayan pa sa pagbalik ni expelled Ako Bicol Partylist Representative Zaldy Co kun may pagbag-o sa iya mga pahayag angot sa flood control anomalies.
Sa interview sang Bombo Radyo Bacolod kay Tinio maayo nga balita para sa mga Pilipino nga nagahulat sang resulta sa imbestigasyon sa kurapsyon ang pagka-aresto kay Co sa Czech Republic.
Suno diri, si Co bilang anay chairperson sang Committee on Appropriations ang may ihibalo nahanungod sa budget preparation kag distribution, luwas sa House Speaker.
Madumduman suno diri nga nagpagwa sang asod-asod nga mga video si Co nga nagatudlo nga si President Ferdinand Marcos Jr mismo ang nag-arrange sang P100 billion budget insertion, kag may P25 billion nga kickback nga gindeliver para sa Presidente.
Samtang nagpahayag man si anay Department of Public Works and Highways Undersecretary Roberto Bernardo nga siya ang may gintrabaho man nga P52 billion nga budget insertion nga may P8 billion nga kickback.
Nagalaom si Tinio nga mapabalik na sa Pilipinas si Co agud mapamatud-an sini ang iya mga pahayag.
Madumduman nga una na nga ginhangkat ni Marcos si Co nga magpauli ini anay antes siya magasabat sa mga alegasyon.
Samtang wala man sini nakita ang effort sang Pilipinas sa pagangita kay Co, bangod ini ang nadakpan lamang sang magatabok kuntani sa Germany apang wala sang mga dokumento, kag indi bangod ginpangita sang otoridad sa Pilipinas agud mapasabat sa corruption issue.
Pahanumdom ni Tinio nga ang sa likod sang kurapsyon ang indi lamang si Co kundi ang madamo nga mga miyembro sang legislative kag executive department partikular na ang Presidente.
Sa pihak nga bahin, ang Office of the Ombudsman ang magafile naman sang plunder case batok kanday former House Speaker Martin Romualdez kag former Senate President Chiz Escudero.
Bangod may makaso na sa mga anay lideres sang Kongreso, ang statement ni Co ang magamit naman batok kay Marcos.
Apang dapat bantayan man sang publiko ang posibilidad sang pagbag-o sang pahayag ni Co.
Ini bangod ginakahangaw-an ang posibilidad nga may matabo na nga pag-areglo kabaylo sang ano man nga pasalig, agud indi maulamid ang Presidente kag iban pa nga opisyal sa kaso.
