Arestado ang 30 ka mga indibidwal matapos madakpan nga naga-operate sang online sabong ukon “e-sabong” sa Sitio Catamnan 2, Brgy Concepcion, Talisay City, Negros Occidental, sang Abril 23 sa isa ka joint operation nga ginpangunahan sang Criminal Investigation and Detection Group (CIDG).
Gin-aresto ang mga suspek sa paglapas sa Presidential Decree No. 1602 angot sa Republic Act No. 10175.
Nakumpiskar sang mga otoridad ang nagkalain-lain nga mga kagamitan nga ginapatihan ginagamit sa ilegal nga operasyon lakip ang mga computer set, laptop, router, 26 ka mga cellphone, pila ka mga video camera nga may tripod, tatlo ka Starlink satellite receiver, 290 ka cockfighting gaffs, mga panabong nga manok, kag iban pa nga may kaangtanan sa online betting kag sabong broadcast.
Suno sa mga imbestigador, ang lugar ang gina-alegar nagaserbe bilang patago nga online cockfighting arena sa diin ang mga sabong ang gina-livestream gamit ang mga camera kag mga digital device para sa remote betting.
Ang mga nadakpan ang gindala na para sa booking, dokumentasyon, kag para sa nagakaigo nga disposiyon.
Ginahanda naman ang mga ipasaka nga criminal case batok sa ila.
