House Committee on Justice, nakakita sang “probable cause” sa duha ka impeachment case batok kay VP Sara

Nag-ugyon ang House Committee on Justice sa Kamara nga may yara sang probable cause agud padayunon ang impeachment case batok kay Vice President Sara Duterte.

Suno kay House Justice Committee Chairperson Rep. Gerville Luistro, tanan nga 53 ka mga miyembro nga nagtambong sa hearing ang nagboto pabor kag wala sang may nagpamatok sa desisyon.

Ang nasambit nga tikang ang resulta sang pila ka impeachment hearings kun sa diin gin-istoryahan ang mga alegasyon sang ginaalegar iregularidad sa paggamit sang confidential funds, makaduluda nga financial transactions, kag mga report sang Commission on Audit angot sa disallowances sa pondo sang Office of the Vice President.

Ginpresentar man sa amo nga hearing ang testimonya sang mga resource person angut sa ginaalegar unverified beneficiaries sang pondo, kasubong man ang report sang Philippine Statistics Authority nga nagapakita sang pila ka mga pangalan nga wala sang record sa civil registry.

Suno sa Anti-Money Laundering Council, may yara sang binilyon ka pesos nga balor sang mga transaksyon may kaangtanan kay VP Duterte kag sa iya asawa nga natumod nga makaduluda ukon subject sa monitoring.

Lakip man sa ebidensya ang report sang National Bureau of Investigation sa isa ka video sa diin gin-alegar nga nagpamahog si VP Duterte batok kay Presidente Ferdinand “Bongbong” Marcos Jr. kag sa iya pamilya, may kaangtanan sa mga reklamo nga inciting to sedition kag grave threats.

Ginpahayag sang pila ka mga mamalidha nga bastante na ang ginpresentar nga ebidensya agud mapadayon ang proseso sang impeachment.

Bangud sini, mahimo nga lauman ang masunod nga tikang sa impeachment proceedings batuk sa Bise Presidente.