Gindala na sa Bureau of Immigration sa Manila ang 42 anyos nga Chinese national nga na-intecept sa Maantangan Port sa banwa sang EB Magalona matapos magtuyo nga magtabok sa Iloilo apang wala sang mapakita nga nagakaigo nga dokumento.
Sa interview sang Bombo Radyo Bacolod kay Commodore Christopher Auro, commander sang Philippine Coast Guard District Visayas, may yara sila sang nabaton nga impormasyon halin sa crew sang isa ka passenger vessel padulong sa Ahoy, Iloilo nga may yara sang na-intercept nga foreign national.
Suno kay Auro, gilayon sila nga nagresponde kag nagpangayo sang bulig sa Philippine National Police kag Bureau of Immigration.
Suno diri, base sa nakuha nga report gikan sa Bureau of Immigration ang Chinese national ang yara sa derogatory record sang ahensya.
Gilayon man nila nga gin-hold ang foreign national kag kahapon sang aga gin-umpisahan nila sang personnel sang BI gikan sa Iloilo kag gin-umpisahan ang initial interrogation.
Apang antes ang interogasyon ginbasahan man ini kun ano ang iya kinamatarong.
Suno kay Auro, nahibaluan nga Chinese ini kag sang 2018 pa ini siya sa Pilipinas.
Dugang pa sini nga nagabiyahe lang ini from time to time kag inconsistent ang iya mga statement.
Suno sa commander sang Philippine Coast Guard District Visayas nga ang nasambit nga persona ang nagbiyahe halin sa Manila padulong sa Bicol padulong sa Cebu kag pakadto sa Dumaguete.
Suno pa kay Auro wala man sang pamatuod nga mapatihan ang mga ginahambal sini kaangay lamang sang paglakat sini halin sa Dumaguete padulong sa Negros Occidental.
Ginpisa pisa man ini pamangkot sang Immigration Officer sang iya mga dokyumento apang wala gid sang may napakita.
Magluwas nga undocumented, overstaying pa sa Pilipinas ang nasambit nga foreign national.
Ginturn-over sang Philippine Coast Guard sa Bureau of Immigration kag gin-escort padulong sa Bacolod-Silay Airport tubtob nga nakasakay sa eroplano padulong sa Manila.
Posible nga madeport ang Chinese National.
