Ginpanindugan ni Supreme Court Senior Associate Justice Marvic Leonen nga dapat gilayon kuntani nga nag-convene bilang impeachment court ang Senado sa kaso batok kay Vice President Sara Duterte, base sa tinaga nga “forthwith” nga yara sa Konstitusyon.
Sa iya concurring opinion sa desisyon sang Korte Suprema, ginpaathag ni Leonen nga ang impeachment court mismo, kag indi lamang ang Senate President ang dapat manguna sa pag-organisa sang trial.
Ang nasambit nga pahayag ang may kaangtanan sa petisyon ni Catalino Generillo Jr.
Apang paagi sa boto nga 14-0-1, ginbasura sang Korte Suprema ang nasambit nga petisyon kag ginkabig nga moot.
Suno sa desisyon nga ginsulat ni Associate Justice Rodil Zalameda, ang Senado ang nakahimo man sang tikang sa nagakaigo nga tion kag wala man sang nakatalana nga deadline ang Konstitusyon kun san-o dapat mag-umpisa ang impeachment trial magluwas sa mando nga ini ang dapat patigayunon “forthwith”, nga nakabase sa diskresyon sang Senado.
Ginsambit man sang Korte nga wala nagakaigo ang petisyon para sa mandamus, nga gingamit agud ipatuman ang athag nga katungdanan.
Sa baylo, ginkabig ini bilang certiorari.
Ginpahayag sang Korte nga bilang co-equal constitutional body, hindi mahimo magpasilabot ang hudikatura sa mga tikang sang Senado magluwas na lamang kun may grave abuse of discretion.
Samtang, wala naga-intra sa botohan si Associate Justice Alfredo Benjamin Caguioa.
Dugang pa sang Korte nga mangin moot ang petisyon bangud nauna na nga ginbasura ang articles of impeachment batok kay Vice Presidente Duterte sang tinalikdan nga tuig.
