Nagapati si anay Senator Antonio Trillanes IV nga mahimo magbag-o pa ang panindugan sang mga Senador sa impeachment complaint batok kay Vice President Sara Duterte sa tion nga mag-umpisa na ang impeachment trial.
Gintumod ni Trillanes ang iya eksperyensya sadtong 2012 sa Senado natuhoy sa impeachment case ni anay Chief Justice Renato Corona.
Ginpahayag sini nga nagabag-o ang desisyon sang senador-judge depende sa pila ka bagay kaangay sang mga ebidensya nga ginpresentar sa tion sang trial, sentimyento sang publiko, kag ‘policy questions’.
Madumduman nga isa si Trillanes sa mga senador nga nagboto nga guilty si anay Chief Justice Corona.
Suno kay Trillanes, indi man klaro sang una kun pila ka mga senador ang magasuporta sa conviction ni Corona tubtob nga kapin sa 2/3 sang mga katapo sang senado ang ulihi nga nagsuporta sini.
Nagakinahanglan sang 16 ka boto sa Senado para sa conviction sang impeachable official nga ginareklamo.
