Ginpahayag sang Embahada sang Pilipinas sa Paris nga indi mahimo nga arestuhon ukon imbestigahan si former Ako Bicol Partylist Representative Zaldy Co apisar ginapatihan nga yara ini sa France subong.
Suno kay Philippine Ambassador to France Eduardo de Vega, indi mahimo nga magpatigayon sang surveillance ukon police operations ang mga opisyal sang Pilipinas sa France bangud magalapas ini sa soberanya kag lokal nga layi sang host country.
Suno diri, ang mga otoridad sang France lamang ang may gahum sa kaangay nga mga imbestigasyon.
Nauna na nga ginpahayag ni Secretary of Foreign Affairs Ma. Theresa Lazaro nga may impormasyon nga nagahambal nga yara sa France si Co kag posible nga nagrequest sang asylum.
Apang, biskan may warrant of arrest sa Pilipinas, indi ini gilayon mapatuman sa iban nga pungsod.
Ginpaathag ni de Vega nga kinahanglan maglabay sa pormal nga proseso pinaagi sa French government ukon international channels kaangay sang Interpol.
Dugang pa, apisar makita si Co sang embassy ukon sang Filipino community, wala sang legal nga gahum para arestuhon ini.
