Dako ang pagpasalamat ni Boxing Trainer Marvin Somodio matapos mangin labing una nga Filipino trainer nga ginpasidunggan sa National Boxing Hall of Fame sa Estados Unidos.
Sa interview sang Bombo Radyo Bacolod kay Somodio, siya ang nag-umpisa nga mangin boxing trainer sa Baguio sang 2007.
Tubtob nga siya ang nadiscover ni Coach Freddie Roach kag gindala ni 8-division boxing champion Manny Pacquiao sa Los Angeles, California sang 2012.
Tubtob sa karun, kabahin ini sa team ni Pacquiao, kag siya man ang trainor ni Jimuel Pacquiao kag Mark Magsayo.
Luwas sa mga Filipino boxers, siya ang may mga ginatrain man nga foreign boxers.
Pahayag sini nga antes malakip sa Hall of Fame, kinahanglan nga madamo na sang napamatud-an kag nangin trainor na sang dalagkuan nga mga pangalan sa boksing.
Sa National Boxing Hall of Fame, indi lamang boksidor ang ginapasidunggan kundi lakip man ang non-participants kaangay sa mga coach, trainors, judges kag reporters.
Suno kay Somodio, siya lamang ang pinakabata sa mga inductee, kun sa diin kaupod sini ang mga dalagkuan nga pangalan sa boxing kaangay nanday Timothy Bradley, Eric Morales, Tito Trinidad kag iban pa.
Panugyan sini sa kaangay nga mga boxing trainers nga kun palangga nila ang ila nga ginahimo, padayunon lamang apisar sa mga kabudlayan.
Sa ulihi sini nga mensahe sa mga Filipino boxing trainers nga ipakita nga “ang galing natin ay world class.”
