Nagpatigayon sang proper disposal ang Negros Occidental Maritime Police Station, Talisay City Environment and Natural Resources Office kag City Disaster Risk Reduction and Management Office sang mga confiscated smuggled cigarettes sa Talisay City Sanitary Landfill sa brgy. Concepcion, kahapon.
Sa interview sang Bombo Radyo kay PMaj Karl Bonilla, acting deputy commander sang Negros Occidental Maritime Police Station, wala nila ginsunog ang mga sigarilyo apang ginshred nila ini kag ginbasa para madispose sang insakto.
Suno diri, gindispose ang 11,450 reams sang illegal cigarettes nga nakumpiskar sa operation nga ginpatigayon sang May 19, 2025 sa brgy. Tiling, Cauayan, Negros Occidental nga may estimated street value nga P8.9 million.
Suno kay Bonilla, bag-o pa lamang gindispose ang mga smuggled cigarettes bangod subong pa lamang nag-abot ang order kag napasakaan na sang kaso ang mga suspetsado.
Pahayag sini, madamo na sang modus ang mga involved sa smuggled cigarettes bangod iban ginabyahe sa dagat, kag may yara sang ginasulod sa container van bangod indi man ini mabuksan sang kapulisan, samtang iban naman nakumpiskar mismo sa manufacturing facility diri sa probinsya.
Apang, nagpasalig si Bonilla nga madakpan sa gihapon ang mga involved diri.
