Ginkondenar sang mga mamalidha naggikan sa Makabayan bloc ang ginapatigayon nga live-fire testing sang Type 88 Surface-to-Ship Missile System sang Japan bilang kabahin sang Balikatan 2026 exercises sa pungsod.
Suno sa grupo, nga ginabug-usan nanday ACT Teachers Representative Antonio Tinio, Gabriela Women’s Party Representative Sarah Jane Elago, kag Kabataan Representative Renee Louise Co, isa ini ka dako nga paglapas sa soberanya sang Pilipinas.
Ginpahayag sang mga mamalidha nga indi dapat magserbe nga “firing range” ang pungsod para sa mga foreign military.
Suno diri, mahimo maapektohan sang nasambit nga mga missile exercises ang mga komunidad nga malapit sa lugar.
Ginpatigayon ang military drills humalin sa Paoay Sand Dunes sa Ilocos Norte tubtob sa Tacloban City.
Suno pa sa Makabayan bloc, dapat pasulabihon sang Pilipinas ang isa ka independent foreign policy nga matuod-tuod nga nagaprotekta sang soberanya kag seguridad sang mga pumuluyo.
Apang ginpahayag naman ni anay Supreme Court Associate Justice Antonio Carpio nga nagakaigo sa Konstitusyon ang ini nga sahi sang live-fire exercises.
Paathag ni Carpio, nuclear weapon lamang ang ginadumilihan sa idalom sang layi kag indi kabahin diri ang nasambit nga missile system sang Japan bangud indi man ini nuclear-armed.
Samtang, nagapanindugan ang Makabayan bloc nga indi dapat tugutan ang mga kaangay sini nga aktibidad sa pungsod.
