Ginbawian sang kabuhi ang isa ka 15-anyos samtang pilason naman ang amay sini matapos mabunggoan sang pick-up samtang nagakay-o sang motorsiklo sa higad sang dalan sa Brgy. Marina sa banwa sang Binalbagan, Negros Occidental alas-2:45 sang kaagahon sang Huwebes, May 7.
Ginkilala ang mga biktima nga sanday alyas Michael, 55-anyos, kasado kag ang iya nga bata si alyas Mike ,15-anyos, lalaki lunsay mga residente sang Sitio Lezares, Brgy. Mambagaton, Himamaylan City, Negros Occidental.
Sa interview sang Bombo Radyo Bacolod kay Police Captain Joelan Vinson, hepe sang Binalbagan Municipal Police Station, nagakay-o ang mag-amay sang ila motorsiklo sa kilid sang dalan sang sila ang naside-swipe sang Isuzu pick up nga ginamenho ni Alyas Nori, 35-anyos, lalaki, kasado kag residente sang Prk 2, Brgy Talubangi, Kabankalan City.
Si Nori ang nagabiyahe gikan sa Binalbagan padulong sa Hinigaran.
Pag-abot sa lugar, hinali lang nga nagsignal si Nor sa sugata sini nga salakyan nga pahinayan ang suga.
Bangod masilaw ang suga, nakibot na lamang ini sang magtindog ang mag-amay gani nagpanick ang driver kag aksidente nga nasideswipe ang duha.
Gilayon naman nga gindala ang mga biktima sa ospital apang ginbawian sang kabuhi ang menor de edad, samtang nakagwa na sa ospital ang amay.
Boluntaryo naman nga nagsungka ang driver sang pick-up kag may settlement na sa tunga sang pamilya sang biktima kag sa tag-iya sang pickup.
