Ginpahayag sang abogado kag anay konsehal sa ciudad sang Bacolod nga kahuluya na sa bug-os nga kalibutan ang ginhimo sang senado sang Pilipinas.
Sa interview sang Bombo Radyo Bacolod kay Atty. Renecito Novero, ang Pilipinas sa karun ang nahimo nga global spectacle of shame kag indi man mabasol si Senator Ronald dela Rosa apang nakahibalo man ang senador nga kun siya ang magsungka siya pagadal-on sa The Hague, Netherlands kag siya ang mangatubang sang non-bailable capital offense.
Suno kay Novero ang resolusyon sang Senado ang wala sang legal force kag ang layi sang Pilipinas ang wala sang provision nga nagahatag sang otoridad sa senado nga himuon nga sanctuary sang bisan sin-o nga akusado.
Suno pa diri, dapat nga magsungka nalang sang matawhay si dela Rosa apang sa karun naguba ang credibilidad sang Senado sa ila ginhimo.
Kaangay lamang sang pag-akig sang mga ini sa National Bureau of Investigation nga nagahimo lamang sang ila katungdanan bilang law enforcement agency.
Dugang pa sini nga sa idalom sang kasuguan ang miyembro sang kongreso ang indi maaresto kun ang ginapangatubang nga kaso ang may sentesyan nga anum ka tuig kag panubo nga pagkapriso.
Suno pa sa abugado sa idalom sang Article 9851 nga naga-penalize sang Crimes Against Humanity kag International Humanitarian Laws nga isa sa nagpirma si Senate President Alan Peter Cayetano.
Sa section 17 sa nasambit nga layi nakasaad didto nga mahimo mag-exercise sang sovereign authority paagi sa pagsungka sang bisan sin-o nga indibidwal nga subject sa arrest sang international court.
