Na-retrieve na sang mga otoridad ang mga bangkay sang New People’s Army (NPA) nga napatay matapos ang nagluntad nga engkwentro sa tunga sang South-West Front kag katapo sang 15th Infantry Battalion sang Philippine Army sa Brgy. Abaca and Brgy. Poblacion, Cauayan, Negros Occidental.
Natumod naman ang tatlo sa lima ka mga napatay sa engkwentro
Sa interview sang Bombo Radyo kay Lt Col. Robert Maduli, Commander sang 15th Infantry Batallion, Philippine Army, ginkilala ang mga ini kanday Rolando Dantes Jr alyas Anio, residente sang Sitio Luoc, Barangay Camindangan, Sipalay City kag siya ang commanding officer sang South-West Front; Joebert Casipong, alyas John, kag Gilbert Tingson, alyas Ryan ukon Alyas Kulintong lunsay mga residente sang Sitio Lower Cabilucan, Barangay Camindangan, Sipalay City.
Suno kay Maduli, ang tatlo ang nakilala bangud may yara sang former rebels nga nakakilala sa ila samtang ang duha ang ginatumod pa.
Suno pa diri, may yara sang isa ka suldado kag isa ka miyembro sang New People’s Army ang napilasan sa nagluntad nga engkwentro sa tunga sang South-West Front kag katapo sang 15th Infantry Battalion sang Philippine Army, sa Barangay Abaca kag Barangay Poblacion, Cauayan, Negros Occidental, Mayo 16.
Ang suldado ang nakaangkon sang kibyas sa liog kag sa karun yara na sa maayo nga kahimtangan samtang ang rebelde naman nga si alyas John Rey ang nakaangkon sang pilas sa paa kag sa buli kun sa diin gindala sa Cauayan District Hospital sa Barangay Isio, Cauayan, Negros Occidental.
