Ginkumpirmar sang Negros Occidental Provincial Legal Officer nga may yara sang duha ka engineer sang probinsya ang ginpaidalom sa 60 days-preventive suspension without pay.
Sa interview sang Bombo Radyo Bacolod kay Atty. Alberto Nellas Jr, ang duha ka empleyado sang probinsya ang ginpasakaan sang formal charges.
Sila amo sanday Engineer Sanny Talinas kag Engineer Rodney Degilla sang Provincial Engineers Office.
Suno kay Nellas, ang pagpasaka sang formal charges ang bangud man sa mga aktibidad sang duha sa Silay Oxygen plant kun sa diin nakita sang PLO nga may mis-management kag corrupt practices.
Ini matapos nga nadiskubrehan sang mga ini nga may ginpahayag nga may ginpatuman nga preventive maintenance apang sang gin-inspection wala man nahimo.
Dugang pa sini nga ila man nakita nga wala gid namaintain ang oxygen plant rason nga nagdeteriorate ini.
Ang ginpasaka nga kaso amo ang grave misconduct, serious dishonesty kag conduct prejudicial to the best interest of the service.
Ang duha ang ginpaidalom sa 60-day preventive suspension without pay kag magapadayon ini samtang ongoing ang administrative case nga ginpasaka batok sa ila.
