Ginpahayag sang director sang Bacolod City Police Office nga courier lamang ang babayi nga nadakpan kag nakuhaan sang 4,200 grams nga suspected shabu nga nagabalor P28.56 million sa ginpatigayon nga buy-bust operation sa Purok Fatima, Islamic Center, Brgy. 31, Bacolod City sang Mayo 19.
Sa interview sang Bombo Radyo Bacolod kay Police Col. Eugene Rebadomia, sa iya nga pagpungko bilang city director sang Bacolod City Police Office, ang nakumpiskar sang Martes nga ginapatihan illegal nga druga ang pinakadako para sa 2024 tubtob 2026.
Suno kay Rebadomia, ang babayi nga nadakpan ang courier lamang kag siya ang nagadistribute sang supply sang nakumpiskar nga suspected shabu kag newly identified drug personality.
Ginpahayag sini nga babayi ang halos nagakadakpan sa ginpatigayon nga drug buybust operation bangud babayi ang ginagamit sang mga drug personalities bilang courier kag distributor.
Tanan nga operasyon sang City Drugs Enforcement Unit sang BCPO ang ginamonitor sang city director apang ginkakibot sini nga tuman kadako nga recovery.
Dugang pa sini nga una naman nga kahigayunan nga nakapatigayon sang buy-bust operation sa Purok Fatima, Islamic Center, Brgy. 31, Bacolod City, bangud indi mahapos sudlon ang lugar.
Madumduman nga naaresto sa operasyon ang isa ka 36-anyos nga babayi nga ginkilala nga si alyas “Riza” ukon “Bong”, residente sang nasambit nga lugar.
Narekober ang pito ka sachet kag lima ka plastic bag nga nagaunod sang suspected shabu nga may kabug-aton nga 4,200 grams nga may balor nga P28.56 million, buy-bust money nga nagabalor P7,000 kag iban pa nga non-drug items.
Sa karon, nakahunong ang suspek sa Bacolod Police Station 6 kag mangatubang sang kaso nga paglapas sa RA 9165 ukon Comprehensive Dangerous Act of 2002.
