Ginakalingawan subong sa online ang ginhingadlan nga “Stir Fry CEO” sa Yantai, Shandong Province sa China bangud sa pinasahi nga estilo sang pagbaligya sang street food.
Sa baylo nga magsuksok sang panapton nga pangkusina, naka-business suit si Xiao Lu, samtang nagaluto sang stir fry sa merkado.
Nag-umpisa si Lu sa pagbulig sa negosyo sang ila nga pamilya sang ini ang naga-edad 17 anyos pa lamang.
Agud ma-notisyar sang mga manugbakal sa kadamo sang food stalls, nagsuksok ini sang vest tubtob nga nag-full suit na gid ini, butang nga gilayon natalupangdan sang kadam-an kag nakakuha sang positibo nga reaksiyon naggikan sa mga customer.
Kada adlaw, humalin alas-5:00 sang hapon tubtob alas-11:30 sang gab-i, makaluto si Lu sang masobra 200 ka servings.
Bangud sa iya nga mga viral videos sa social media, ginadayo ini sang mga turista.
Suno kay Lu, bangud sa curiosity, una nga nagabakal ang mga tawo, apang ang matuod nga rason sang ila pagbalik amo ang manamit nga sabor sang ila nga pagkaon.
