Ginbawian sang kabuhi ang isa ka senior citizen matapos magbungguanay ang ginamaneho sini nga motor kag pribado nga salakyan sa Hacienda Santo Niño, Brgy. Buluangan, San Carlos City, Negros Occidental sang Mayo 21 sang gab-i.
Sa interview sang Bombo Radyo Bacolod kay Police Captain Rodney Sarona, hepe sang San Carlos City Police Station, nakabaton sila sang tawag halin sa concerned citizen nga may yara sang nagluntad nga aksidente sa nasambit nga lugar.
Suno kay Sarona, ang imbulbado sa aksidente ang isa ka salakyan nga itom nga Toyota Vios kag isa motorsiklo.
Ang driver sang motorsiklo ang ginkilala kay Junie Verez, 70-anyos kag residente sang Brgy. 2, San Carlos City kag ini ang napatay samtang ang driver sang pribado nga salakyan nga si Eugene Opciar kag residente sang Brgy. Buluangan sang nasambit nga ciudad ang nasamaran.
Santo sa imbestigasyon ang salakyan ang gikan sa norte nga bahin sang ciudad samtang ang gikan naman sa sur ang motorsiklo kag sang pag-abot sa National Highway, Sitio Santo Niño, Brgy. Buluangan naglapaw sa linya sang salakyan ang motorsiklo nga nangin rason sang nagluntad ang aksidente.
Ang motorsiklo ang wala natalupangdan sang driver sang salakyan bangud wala ini sang headlight.
Sa karon nagapadayon ang imbestigasyon sa nagluntad nga aksidente kag ginahulat ang desisyon sang pamilya sang nagtaliwan nga senior citizen.
Nagpanugyan ang hepe nga maghalong sa tanan nga oras sa tion nga magmaneho bangud ang aksidente ang indi mapulong.
