Magahatag ang alkalde sang Cadiz City sang bulig sa pamilya sang babayi nga ginpatay kag nasapwan nga wala na sang pang-idalom nga panapton sa Sition Capayas, Brgy Sicaba, Cadiz City sang Mayo 21.
Madumduman nga ang biktima ang ginkilala nga si Jenny Ann Delano, 38-anyos, kasado, may isa ka bata nga babayi kag residente man sa lugar.
Sa interview sang Bombo Radyo Bacolod kay Cadiz City Mayor Salvador “Bading” Escalante, natapos na ang imbestigasyon kag nagapatigayon na sang manhunt operation ang mga kapulisan sang Cadiz sa duha ka mga nakilala nga mga suspetsado sa pagpatay sa biktima.
Suno kay Escalante, ginsabat na sang Department of Social Welfare and Development (DSWD) ang kinahanglanon sang pamilya para sa bangkay kaangay sang lungon kag pagpalubong.
Ginpahayag sang alkalde nga natumod na sang mga otoridad ang suspetsado kag may ang isa diri may yara na sang laragway nga ginpalapta sa ciudad agud ini ang madakpan.
Dugang pa sang alkalde, ang biktima ang may yara sang loan nga ginkuha sang Mayo 21 kag ini ang ginalantaw nga motibo sa pagpatay diri.
Ginluslos man ang pang-idalom nga panapton apang santo sa imbestigasyon wala man sang nakita signs nga ini ang ginhimuslan.
Suno diri, mahimo nga diversionary tactic lamang ini.
Mensahe sini sa pamilya nga nagapakig-unong ang ciudad sa natabo kag nagpanugyan ini sa mga suspetsado nga magsungka na agud nga mabuhinan ang penalidad nga iya atubangon.
Suno pa diri kun nahadlok ini nga magsungka bangud mahimo nga ini ang sakiton, magkadto lang ini sa iya agud maupdan sa pagsungka sa mga kapulisan kag indi na siya mahalitan.
