Opisyal na nga nagbukas ang 66th Palarong Pambansa nga ginatawag locally nga Palaro Tu Agsur.
Gin-abi-abi ang 13,000 ka mga delegasyon samtang ang probinsya ang naga-host sang prestihiyoso nga tuigan nga sporting event para sa mga student athletes sa elementary kag secondary sa pungsod.
Ginpatigayon sang mga organizers ang opening ceremonies kahapon sang hapon sa Datu Lipus Makapandong Governor D.O. Plaza Sports Complex sa banwa sang Prosperidad.
Gin-umpisahan ang opening rites paagi sa air exhibition gikan sa pila ka mga katapo sang Philippine Air Force antes magsulod ang mga student-athletes sa stadium para sa traditional parade of colors.
Ang mga atleta sang Paragames ang una nga nag-abot kag ginsundan sang mga halin sa Bangsamoro Autonomous Region in Muslim Mindanao (BARMM), Cordillera Administrative Region (CAR), National Capital Region (NCR), kag Negros Island Region (NIR).
Nag-upod man sa parada ang mga Rehiyon I tubtob XIII kun sa diin makita ang linibo ka mga tiglawas sa 24 ka regular nga sports, tatlo ka demo sports, kag apat ka exhibition sports.
Magluwas sa 18 ka mga rehiyon sang Pilipinas, ang National Academy of Sports kag Philippine Overseas Schools nagpadala man sang mga delegado sa mga hampang.
Pila sa mga dinapit nga bisita amo sanday Senator Jinggoy Estrada, DepEd Secretary Sonny Angara, Special Assistant to the President Antonio Lagdameo kag Philippine Sport Commission Chairman John Patrick “Pato” Gregorio.
Ginpangunahan sang Oath of Sportsmanship ang pencak silat athlete nga si Precious Hope Sumile Maghuyis samtang ginpangunahan naman sang Oath of Officiating Officials ang Olympic gold medalist nga si Hidilyn Diaz-Naranjo.
Sa pihak nga bahin, ginturn-over ni Philippine Sport Commission Chairman John Patrick “Pato” Gregorio kay DepEd Secretary Sonny Angara ang P10 million para sa incentive sang mga atleta.
