Liwat naman nga nagtindog sa entablado sang Palarong Pambansa ang Philippines’ first Olympic gold medalist Hidilyn Diaz-Naranjo.
Ini matapos nga ginpangunahan sini ang oath taking sang officiating officials sa pagbukas sang 2026 edition sang nasambit nga national event sa Datu Lipus Makapandong Governor D.O. Plaza Sports Complex sa banwa sang Prosperidad, kahapon, Mayo 24.
Apang ang subong nga tuig ang may dako nga kahulugan para kay Diaz-Naranjo bangud ang weightlifting ang maga-debut bilang regular medal event sa Palarong Pambansa matapos gin-feature bilang demonstration event sang nagligad nga tuig sa Ilocos Norte.
Nalakip sa regular medal event sa national games ang weightlifting bangud sa wala kakapoy nga pagduso ni Diaz tubtob nga natuman ini.
Sang nagligad nga tuig, ang una nga Filipina Olympic gold medalist personal nga nagtambong sa pagsaksi sang debut sang weightlifting bilang isa ka demonstration sport, samtang nagaserbe man bilang direktor sang torneo para sa kompetisyon, kun sa diin ang iya hinablos, si Mathew Diaz, nakakuha sang bulawan nga medalya sa secondary boys’ 48 kg division.
Ginpasalamatan sang gobernador sang Agusan Del Sur ang tanan nga mga delegado nga nagpadulong sa ila nga probinsya para sa Palarong Pambansa 2026 apisar nga malayo ang ila nga lugar kag wala sila sang airport kag coastlines.
Sa mensahe ni Agusan del Sur Governor Santiago Cane Jr., gin-abi abi sini ang tanan nga mga delegado nga nagbiyahe sang malayo kag nag-agi sa dalan nga napalibutan sang bukid kag mga suba agud lamang nga makalab-ot sa ila nga probinsya.
Suno kay Cane, naghulat sila sang 33 ka tuig antes liwat nga nakahost sang national games.
Ang paghost sang probinsya sang Palarong Pambansa 2026 ang isa ka dream come true para sa madugay na nga handom sadto sang anay gobernador sang probinsya nga si Democrito O. Plaza kag nagtinguha nga matukod ang Democrito O. Plaza Sports Complex kun sa diin ginpatigayon ang opening ceremony sang national games.
Suno diri, nakahibalo ini sang mga sakripisyo sang mga atleta bangud siya ang isa man sadto ka atleta kag nangin gold medalist sa weightlifting.
Samtang nagpanawagan man ini sa national and local government nga magdihon sang tikang agud nga mahatagan ang tanan nga mga atleta sang oportunidad agud nga mag-excel indi lang locally kundi sa international man.
Nagpanugyan ini sa mga atleta nga ini na ang ila kahigayunan agud nga ipakita ang ila ikasarang agud nga makakuha sang medalya.
