Ginapanginbulahan sang City Director sang Bacolod City Police Office ang mga kapulisan sa Bacolod City Police Station 2 matapos nga natigayon nga makumpiskar ang P14.2 million nga balor sang illegal nga druga sa sa ginpatigayon nga drug buy-bust operation sang Police Station 2 sa Purok Camonsil, Barangay 3, Bacolod City sang Mayo 24, 2026 sang kaagahon.
Sa interview sang Bombo Radyo Bacolod kay Police Col. Eugene Rebadomia, padayon pa ang ila nga imbestigasyon sa karun agud nga mahibaluan kun ang duha ka mga lalaki nga nadakpan kag nakuhaan sang P14.2 million nga balor sang shabu ang konektado sa isa ka babayi kun sa diin nakumpiskar ang kapin 4,200 grams sang suspected shabu nga nagabalor P28.56 million sa Purok Fatima, Islamic Center, Brgy. 31, Bacolod City sang Mayo 19.
Aminado si Rebadomia nga bisan siya ang indi makapati sa kadamuon kag kabug-aton sang illegal nga druga nga ila nga nakumpiskar.
Ginalantaw nga ginpaagi sa dagat ang pag-transport sang illegal nga druga apang ini pa ang padayon nila nga tumod sa karun.
Nagapasalamat ang city director sa mga pumuluyo nga naghatag sang impormasyon sa mga kapulisan nga gingamit sa monitoring rason nga nadakpan ang tatlo ka persona kag nakuhaan sang kinilo nga suspected shabu.
