Ginpamatukan sang isa ka residente sang Barangay 9, Bacolod City ang application sang voters registration sang 42 ka mga applicants.
Sa interview kay Bacolod Election Officer Atty Katrina Trinio Cania, nag-file sang opposition ang isa residente batok sa application sang 42 ka mga applicants bangud sa gina-alegar nga wala man ang mga ini makita sa nasambit nga Barangay kag wala man nila ini makilala.
Suno kay Cania, ang oppositor amo si Miss Marites Ramos nga residente sang Barangay 9.
Ang 42 ang nagparehistro sang tinalikdan nga voters registration period kag suno sa opposition nga indi dapat pagpasugtan nga makabutar sa Barangay 9 bangud wala man nila nakilala kag nakita sa Barangay ang mga ini.
Si Ramos ang nagpasa sang iya nga opposition sang Lunes.
Suno kay Cania, sa June 1 may patigayunon nga ERB hearing kag lantawon pa kun ano ang mangin desisyon.
Suno diri sa tion nga magparehistro agud nga makaboto may ginapangayo ang mga ini kaangay sang ID kag kun mahatag ginabaton man ang application.
Suno sa Bacolod Election Officer bangud may yara sang nagpamatok sa application sang 42, pangayuan ang mga ini sang dugang nga dokyumento.
Sang tinalikdan nga mga tinuig ang mga dugang nga dokyumento ang ginapasa amo ang titulo sang duta kag mga school records sang ila nga mga kabataan.
Dugang pa sini nga kun mapasa naman lang ang dugang nga ginapangayo nga dokyumento, pagaaprubahan naman lang ang application sang mga ini.
