Patay ang isa lalaki matapos nga gintiro sang wala pa makilal-an nga suspetsado sa Purok Puno Banago, Barangay Banago, Bacolod City kagab-i, Mayo 27.
Ang biktima ang ginkilala kay Victor Hermano, 39 anyos, single kag residente sang Tinagong Paraiso, Barangay Banago.
Sa interview sang Bombo Radyo Bacolod kay Amalia Hermano, tiya sang biktima, antes ang shooting incident bag-o pa lamang nakapauli kaupod ang iya pakaisa halin sa pag-home service sa pag-grooming sang mga ido kag kuring.
Nagwa ini kag nagkadto sa Puno Banago agud nga magbakal sang sud-an.
Suno kay Amalia, may nagpahibalo nga may shooting incident kag ang hinablos sini ang biktima.
Una wala pa ini nagpati apang sang nagkadto ini sa Puno Banago nakita niya nga nagahuray-ad nalang ang iya nga hinablos kag wala na sang kabuhi.
Dugang pa sini, napriso sadto ang iya hinablos samtang ginareklamo man ini sa Barangay apang na-settle man gilayon.
Mabuot nga bata ang pagkakilala sini sa biktima.
Ginapahayag sang pila ka mga residente nga may yara sila sang nabatian nga duha ka lupok kag ginapahayag man nga may yara sang nakakita nga antes ang shooting incident may nakita ang mga ini nga riding in tandem kag may mga tabon ang nawong sang mga ini.
Samtang, ginkumpirmar sang station commander sang Bacolod Police Station 3 nga duha ang suspetsado sa nagtiro-patay kay Hermano.
Trabaho ni Hermano amo ang mag-upod sa iya pakaisa sa home service sa pag-grooming sang ido kag kuring kag kun kaisa nagapangscrap man ini.
Sa interview kay Police Captain Rosalino Pugoy Jr, station commander sang Bacolod Police Station 3, may background na sila sa biktima apang indi pa gid ma-divulge samtang padayon ang imbestigasyon.
Suno kay Pugoy, sa CCTV footage, nakita nga nagalakat si Victor, sang may naglabay nga motorsiklo.
Sakay diri ang duha ka indibidwal apang ipaidalom pa sa enhancement ang footage agud nga mahibaluan kun may tabon ukon wala ang nawong, ano ang motorsiklo ang gingamit kag ang plate number bangod malayo ang CCTV.
Lantawon pa kun pila ang samad sang biktima apang sa inisyal duha ang nabatian nga lupok sang wala pa natumod nga armas-luthang.
Sa karun ginatumod pa sang mga kapulisan ang motibo sa pagpatay kay Hermano kag sin-o ang mga suspetsado.
