Patay ang 45 anyos nga driver sang motorsiklo matapos nga malapakan sang cargo truck sa National Highway sang Barangay Blumentritt, Murcia, Negros Occidental sang Mayo 24.
Sa imbestigasyon, ang motorsiklo nga Suzuki Skydrive 125 nga ginamaneho ni Alyas Rey, 45 anyos, single kag residente sang Purok Sunrise, Barangay Blumentritt, Murcia ang nagabiyahe halin sa Canlaon View Subdivision kag magasulod kuntani sa national highway sang ini ang aksidente nga nabungguan sang motorsiklo nga Kawasaki Bajaj 125 nga ginamaneho ni alyas Dan, 23 anyos, single, utility worker kag residente sang Purok Gonzaga, Barangay Mansilingan, Bacolod City.
Bangud sa impact, nagtabog si alyas Rey sa inner lane sang karsada kun sa diin nalapakan sang cargo truck nga ginamaneho ni alyas Wiwi, 40 anyos, single kag residente sang Barangay Batad-Batad, Moalboal, Cebu City.
Nakaangkon sang patal nga pilas ang biktima kag ginhingagaw pa dala sa Murcia Rural Health Unit apang gindeklarar nga dead on arrival.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, may yara na sang inisyal nga pag-estoryahanay ang bahin sang pamilya sang biktima kag sang driver sang motorsiklo kag truck apang wala pa matumod kun may yara na sang settlement.
Nakahunong sa Murcia Municipal Police Station ang driver sang cargo truck kag ang driver sang Skydrive 125 nga motorsiklo.
Suno kay Labaro, makagwa man ang mga ini sa tion nga matapos ang reglementary period kag wala sang may magpasaka sang kaso batok sa ila.
Pahanumdom sini sa tanan nga motorista nga masami naton tandaan ang ginatudlo humalin sang kita ang bata pa nga “Stop, Look and Listen” agud nga malikawan ang aksidente sa dalanon.
