Ginpasalamatan sang alkalde sa ciudad sang Silay, Negros Occidental ang pagkadakop sa Number 1 Most Wanted Person Regional Level sang Negros Island Region nga isa sa mga suspek sa shooting incident sang May 12, 2025 elections sa Barangay Mambulac, Silay City.
Madumduman nga duha ang napatay kag may walo nga napilasan.
Tatlo ang ginatudlo nga suspect sa shooting incident sa mga volunteers sang Team Ugyon nga nagamonitor sa nagaserbe nga meeting place sang Team Asenso, bangod sa alegasyon sang vote buying.
Ginalakipan ini ni Punong Barangay Arnie Benedicto sang Brgy Lantad, Silay City, nga gilayon nga nagsurrender matapos sang krimen; apang ang duha sini nga kaupod ang nagpalagyo.
Sa interview sang Bombo Radyo Bacolod kay Silay City Mayor Joedith Gallego nga nagapasalamat gid ini sa mga kapulisan nga naghimo sang operasyon agud nga madakpan ang mga suspek nga nakapalagyo.
Suno kay Gallego nahatagan na sang hustisya ang mga pamilya sang napatay kasubong man sang mga nasamaran.
Suno sa alkalde ang pagkadakop sa suspek ang nagapakita lamang nga wala sang bisan sin-o ang makapalagyo sa layi.
Sa police report una nga naaresto ang isa sa mga at large paagi sa pagserbe sang warrant of arrest sang Abril 30 nga ginkilala kay si Alyas Jose, 32 anyos, kasado, wala sang trabaho, residente sang Hacienda Grande, Brgy Robles, La Castellana.
Sang Huwebes, naaresto naman ang isa pa ka suspect nga ginakonsiderar na nga No. 1 Most Wanted Person sa Regional level.
Ini amo si Alyas Clar, 43 anyos, single, wala sang trabaho, kag residente naman sang Proper Brgy Robles, La Castellana.
Si Clar ang nadakpan sa Purok Paho, Barangay Rizal, Silay City.
Ang suspect ang mangatubang sang kaso nga 6 counts sang Frustrated Murder, kag 2 counts sang Attempted Murder.
