Ginbuyagyag sang team manager sang Volleyball Secondary Girls sang Bacolod Tay Tung High School nga plano sang team nga indi na kuntani paghatagan pa sang score ang National Capital Region sa Volleyball Secondary Girls Finals sa Palarong Pambansa 2026.
Kahapon, nalutos ang NIR batok sa NCR sa apat ka set sang game.
Sa first set nagdaog ang NIR sa score nga 25-22 apang sa mga masunod nga set nagdaog ang NCR sa score nga 14-25, 19-25, kag 18-25.
Sa interview sang Bombo Radyo kay Jose Boy Montalbo, team manager sang Volleyball Secondary Girls NIR, pag-umpisa pa lang sang finals, plano na sang team nga indi paghatagan sang score ang NCR apang indi man malikawan nga ma-injured ang key player nila nga si Rhose Viane Almendralejo.
Suno diri, duha sa ila nga team ang na-injured nga lunsay mga key player amo nga nabudlayan ang team sa pagshuffle sa ila players.
Sa karun, nakagwa na sa ospital si Almendralejo kag nakakuha pa ini sang tatlo ka award bisan nga nagbalik ini nga naka-wheelchair.
Pahayag ni Montalbo, indi huring-huring nga indi nila paghatagan sang score ang NCR bangod makontrolar sang NIR ang hampang kag kapin sa pito ka tuig na sila nga nagabalik-balik sa Palaro amo nga dako na ang eksperyensya sang senior players.
Subong nga tuig tatlo sa players sini ang maga-gradwar apang may yara sang magabulos sa ila nga mga mabaskog man nga athlete.
Pasalig sini nga magabalik sila nga mas mabaskog sa masunod nga tuig kag dayonon nila ang ila plano nga wala natabo subong nga Palarong Pambansa.
