Nagapanawagan ang Mandalgan Elementary School sa mga ginikanan nga magpartisipar sa Brigada Eskwela kag enrollment nga magasugod bwas nga adlaw Hunyo 1 tubtob Hunyo 5.
Sa interview sang Bombo Radyo kay Lerma Abaring Oyog, Brigada Eskwela 2026 Chairman, Mandalagan Elementary School, ginpahayag niya nga ang tinutuyo sang Brigada Eskwela amo ang pagpreparar sang eskwelahan agud mangin limpyo, luwas, kag maayo ang kondisyon antes magsugod ang klase kag mabatyagan man sang mga ginikanan nga yara sa maayu ang kahimtangan sang eskwelahan sang ila mga kabataan.
Suno diri, kabahin man sang kampanya sang Brigada Eskwela ang Brigada Pagbasa Program, nga nagatuyo nga mapasanyog ang pagbasa sang mga kabataan antes ang pagbukas sang klase.
Suno kay Oyog, nagakadto sa nagkalain-lain nga purok ang mga manunudlo agud magtudlo, mag-storytelling kag may reading activities man para sa mga kabataan.
Gani, nagapanawagan ini sa luyag nga mag-donar sang mga libro nga mahimo magamit sang mga kabataan sa ila pagbasa kag pagtuon.
Samtang…preparado na ang tanan nga elementary school kag highschool sa ciudad sang Bacolod s sa Brigada Eskwela kag enrollment para sa pagbukas sang klase sa Hunyo 8.
Sa interview sang Bombo Radyo kay Celestino Nifras Jr., Brigada Eskwela, Division Coordinator, Bacolod City, ginpaathag sini nga isa lang ang tinutuyo sang Brigada Eskwela amo ang ang pagpreparar sang mga classroom antes ang pagbukas sang klase.
Suno diri, may patigayunon nga division kick-off activity bwas sa Bacolod City National High School.
Dugang pa niya, madamo na sang mga preparasyon kag meeting nga ginpatigayon sa preparasyon sang mga eskwelahan.
Ginapangabay man niya ang suporta kag pagbinuligay sang komunidad sa Brigada Eskwela agud mangin matinlo kag organisado ang mga classroom.
Suno diri, nagsugod na sang nakaligad nga semana ang enrollment.
Ginapangabay sini ang mga ginikanan nga mag-upod sa ila mga kabataan sa pagpa-enroll sa eskwelahan.
Pahayag sini nga nagabaton man ang mga eskwelahan sang mga donasyon kaangay sang pintura, silhig, kag iban pa nga materyales nga magamit sa paglimpyo kag pagpaayo sang mga classroom….Nagapanawagan man ang Mandalagan National High School sa mga ginikanan, estudyante, stakeholders kag pribado nga sektor nga magkooperar kag magbuylog sa Brigada Eskwela kag enrollment bilang preparasyon sa pagbukas sang klase sa Hunyo 8.
Sa interview sang Bombo Radyo kay Edmundo Pagunsan Jr., School Principal sang Mandalagan National High School, ginpaathag sini nga ang Brigada Eskwela indi lamang tiyempo nga magpangayo sang bulig ukon kooperasyon ang mga manunudlo sa mga ginikanan kundi isa ini ka baganihan kag pagbinuligay para sa kaayuhan sang mga kabataan.
Suno kay Pagunsan, nagabaton ang eskwelahan sang nagkalain-lain nga donasyon nga mahimo magamit sang mga kabataan.
Lakip diri ang suporta para sa Project Panday kun sa diin kinahanglan ang mga gamit pangpanday kag iban pa nga materyales para sa pag-ayo kag pagmintinar sang pasilidad sang eskwelahan.
Samtang suno diri, dungan ang Brigada Eskwela kag ang enrollment.
Gani, gina-agda ni Pagunsan ang mga gnikanan sa pag-opd sang ila mga kabataan nga magpa-enroll bwas Hunyo 1 tubtob Hunyo 5.
Suno kay Pagunsan, ang tagsa ka miyembro sang komunidad ang may importante nga papel sa pagpasanyog sang edukasyon sang mga kabataan, kag ang paghatag sang tion, bulig ang isa ka daku nga kontribusyon agud masiguro nga preparado ang eskwelahan sa pagsugod sang klase.
