Indi tanan nga beauty transformation ang mangin isa ka dream come true.
Ang iban, nagaserbe nga leksyon sa kadam-an.
Kaangay lang sa natabo sa isa ka babayi nga si Wang sa Jiangsu, China nga indi na mapiyong ang iya mga mata kun matulog matapos ang isa ka palpak nga double eyelid surgery sa isa ka indi lisensyado nga clinic sang 2020.
Matapos ang operasyon, naglala ang iya kondisyon kag natukiban sang mga doktor nga naguba ang iya tear ducts kag sala ang pagkahimo sang surgery.
Bisan pa nagpaidalom siya sa corrective surgery, nagpadayon gihapon ang halit sa iya mata kag ginakabig ini nga Level 9 disability sang 2022.
Nagpasaka sang kaso si Wang batok sa surgeon nga si Meng matapos matukiban nga wala ini sang medical license.
Nag-areglo ang duha kag nagsugtan nga magabayad si Meng sang 850,000 yuan ukon masobra P7.7 million sa baylo nga pagkakas ni Wang sang tanan niya nga social media posts kag indi na pag i-sugid ang iya eksperyensya sa publiko.
Apang sang nag-post liwat si Wang online agud depensahan ang iya kaugalingon matapos siya gin-insulto ni Meng sa social media, ginakabig ini nga paglapas sa ila kasugtanan.
Bangud sini, ginpasakaan siya liwat sang kaso kag ginpaboran sang korte si Meng.
Ginmanduan si Wang nga magbayad sang 400,000 yuan ukon masobra P3.6 million santo sa ila napirmahan nga kasugtanan.
Suno kay Wang, mabudlay gid ang pagpakigbato para sa iya mga kinamatarong kag nagpaandam siya sa iban nga kababayihan nga magpaminsar sang maayo antes magpaidalom sa cosmetic surgery bangud mahimo ini magresulta sang paghinulsol.
