Ginpahayag sang isa ka abugado sa ciudad sang Bacolod nga ang 12 nga quorum sang Senado kahapon nga rason para madayon ang plenary session kahapon ang indi lang estorya kuris-kuris kundi may yara ini sang ginbasehan.
Sa interview sang Bombo Radyo Bacolod kay Atty. Cesar Beloria, ang ginbasehan sang quorum kahapon ang desisyon sang Korte Suprema sa Avelino vs Cuenco.
Nahibaluan nga si Jose Avelino amo ang Senate President sadto ang may mga seryoso nga akusasyon sang korapsyon batok sa diri gani nagpasar sang resolusyon ang mga kaupdanan sini sa Senado para sa imbestigahan kag suspendihon siya.
Agud mapunggan ini, gulpi lang nga nag-walkout si Avelino kag ang 11 niya ka mga kaupod nga senador, kag gindeklarar niya nga “adjourned” na ang session.
Apang nagpabilin ang 12 ka senador sa session hall kag ginpili sang mga ini si Mariano Jesus Cuenco bilang Acting Senate President.
Ginkwestiyon ini ni Avelino sa Korte Suprema sa alegasyon nga illegal ang pagpili kay Cuenco bangud wala sang “quorum”.
Suno sa Konstitusyon sadto, ang quorum dapat amo ang mayorya sang tanan nga miyembro sang Senado.
Apang sang ulihi, naghambal ang Korte Suprema nga kun sumahon ang quorum, ang basehan amo lamang ang mga miyembro nga yara sa sulod sang jurisdiction sang pungsod kag mahimo nga makatambong.
Bangud 23 lang sila nga yara sa Pilipinas bangud ang isa ang yara sa luwas sang pungsod, ang mayorya sang 23 amo ang 12 gani, may husto nga quorum ang Senado sang ginpili si Cuenco.
Suno kay Beloria, apisar nga indi makaintra ang Korte Suprema sa Senado apang dapat tanan nga ang nasambit nga departamento amo ang interpreter sang layi.
Dugang pa sang abugado, ang ginhimo ni Senate President Alan Peter Cayetano nga pag-adjourned sang Senado paagi sa memorandum ang indi husto bangud ang adjournment ang ginapaagi sa deliberation.
Ginpahayag man sini nga apisar nga nag-adjourned sine die na ang Senado kahapon, magapadayon ang mga committee hearings bangud ang Senado ang continuing body.
