Kadungan sang pag-release sang tribute film nga “Home Along da Riles, Da Reunion”, liwat nga naggwa ang panawagan nga kilalanon bilang National Artist ang nagtaliwan nga Comedy King nga si Dolphy.
Suno sa bata sini nga si Vandolph Quizon, nagpabutyag sang suporta sanday Quezon City Mayor Joy Belmonte kag Manila Mayor Isko Moreno agud mapatigayon ang nominasyon sang beterano nga komedyante para sa Order of National Artists.
Ginpahayag man ni Vandolph nga madugay na nga ginaduso sang pamliya kag tagasuporta ang pagkilala nga ini para sa Comedy King, nga ginakabig isa sa pinakadako nga personalidad sa maragtas sang Philippine entertainment industry.
Apang, kinahanglan pa nga hulaton ang masunod nga tion sang nominasyon para sa nasambit nga pasidungog.
